Loading...

رئيس مجلس الإدارة ورئيس التحرير

بدر صبحي

أخر الأخبار

رسالة للرئيس القادم ؟؟؟؟

بواسطة admin | تعليق 0 | 18 مايو 2014

رسالة للرئيس القادم

بقلم / ابراهيم الباز

باعتبار انى هعمل عبيط وكأني مش عارف هو مين … وباعتبار انى هوجه الرسالة للرئيس اللى جاي بكل حيادية ايا كان هو مين …

ياريس عايز اقولك كلمتين ورد غطاهم … وزي ما اسم صفحتي هنا كلمتين في رغيف فاعتبرهم فعلا كلمتين في رغيف …

رغيف

طبعا مش محتاج اقولك انك داخل على ايام ما يعلم بيها الا ربنا … داخل على شعب جاب اجل نص حكامه سواء بالاغتيال او الذبحة او الشلل او الجنان … من الاخر وغالبا مفيش رئيس خرج من البلد دي على رجلية زي اي حد طبيعي وعاش زيه زي اي مواطن عادي

مش محتاج اقولك ان عندك اعداء جوا واعداء برة واعداء تحت السرير وفوق الدولاب وفي حنفية الحوض منتظرين لك الغلطة … وناس منتظرة تحلل لك وقفتك وسكوتك وكلمتك وعايزين يتصيدوا لك اي خطأ عشان جهاز الألش يبدأ والتريقة والسخرية عملا بالمثل اللى بيقول عايز تكسر رئيس ابدأ اسخر منه ومن هيبتة

مش محتاج اعرفك ان الشعب داق الويل بجد واتفرم بجد وشبع من الخطابات العاطفية والسهوكة والكلام الحنين اللى لو الشعب عايز حد يقوله كان ممكن ينتخب تامر حسني احسن … الشعب محتاج اللى يحس بالفقير قبل الغني .. ويعمل له حاجة .. مش عنيه تدمع وبس

الشعب محتاجك تضرب بأيد من حديد على اي حد يخالف القوانين او يخرب او يدمر في البلد وبنفس الايد تكون رحيمة مع الغلبان والضعيف ..

الشعب للاسف معندوش صبر ومنتظر حلول من السما وصراحتك معاه هو اول الطريق والاعتراف بالمشكلة اول طريق لحلها .. هتعمل اللي عليك وزيادة شوية وانتظر كلمة شكرا من الشعب مش من المطبلاتية #اعدم_بكري_وخليك_جدع

المطبلاتية هما اول مسمار في نعشك واول ناس هيبعدوك عن الشعب وهتغاضي عن ان المطبلاتية بدأوها معاك من بدري اوي اوي اوي … وهحاول اعتبر انك اذكي من انك تتخدع بكلامهم الى ان يثبت العكس

الشعب يا ريس لو شاف بوادر تطهير للفساد او تنمية في البلد ولو على استحياء في الاول ممكن يهد الجبال بأديه .. لازم التغيير يحس بيه قاع المجتمع قبل قمته .. ولازم الشاب يحس ان له وجود في مصر وفي الحكومة وفي الدولة #كفاية_مومياوات #شباب_في_التسعين #الدهن_في_العتاقي

واوعى تركن يا ريس ان الشعب بيحبك … الشعب اللى هتف بحياتك وصوت لك في الانتخابات واعتبرك بطل … هو نفس الشعب اللى غنى اخترناه وبايعناه .. وبالروح بالدم … وفي الاخر خلع واحد وعزل التاني ورمى الجوز في السجن …. اتمنى انك تكون اخدت عبرة من الاتنين طالما المعزول الغبي مفهمهاش … الشعب له طاقة ولو حس ان مفيش تغيير او ان الاوضاع مازالت للاسوء مش هيسمي عليك ولا هيسيبك عشان سواد عيونك

ربنا ابتلانا برئيس مبيسمعش … وجه بعده دلدول مبيفهمش … اتمنى انك انت اللى تعدل المايلة .. لاننا استوينا بجد الحمل تقيل جدا انا عارف ويقطم الوسط لكن الناس متعشمة في ربنا ثم فيك انك هتقدر تعمل حاجة فخليك عند حسن ظنهم بيك وابدأ بتطهير البلد من الفساد دة على الاقل هيحسس الناس بالفرق .. وخلي بالك ان اللى عايزينك تفشل كتيييييير لكن دايما ثق ان ربنا شايف ومطلع …

انت بتتعامل مع شعب رجله اخدت على المظاهرات … وبياخد ولاده معاه وبينزل يتفرج على حظر التجول ويرقص فيه … وبيعشق ريحة القنابل المسيلة للدموع … والخرطوش بالنسبة له حبوب حمو نيل وهتروح لحالها ….وبيقف قدام مدرعات ولا بيهمه .. فأي تصرفات طايشة سايق عليك النبي تنساها تماما ودايما تفاهم مع الشعب في اي مشكلة …

عبد الناصر يا ريس اتشتم في زمنه وبعد ما مامات والسادات برضة اتشتم في زمنه وبعد مامات حتى الملك فاروق نفس الحكاية … فكبر دماغك من اي حد يغلط فيك وربنا مطلع على كل واحد واشتغل بما يرضى الله ويرضي ضميرك . وربنا مش هيضيع تعبك #مش_بتلزق

 مقالات ذات صلة

 أكتب تعليق


جميع الحقوق محفوظة لجريدة الحقيقة اون لاين 2014 - 2015